ਅਮਰੀਕਾ ਵੱਲੋਂ ਇਰਾਨ ‘ਤੇ ਹਮਲਿਆਂ ਤੋਂ ਬਾਅਦ ਉਤਪੰਨ ਹੋਈ ਤਣਾਅ ਭਰੀ ਸਥਿਤੀ ਵਿਚ ਭਾਰਤ ਨੇ ਕਿਹਾ ਕਿ ਲੋਕਾਂ ਨੂੰ ਇੰਧਨ ਦੀ ਕੋਈ ਕਮੀ ਨਹੀਂ ਆਉਣ ਦਿੱਤੀ ਜਾਵੇਗੀ। ਤੇਲ ਮੰਤਰੀ ਹਰਦੀਪ ਪੁਰੀ ਨੇ ਕਿਹਾ ਕਿ ਸਪਲਾਈ ਲਈ ਵਿਅਕਲਪਿਕ ਰੂਟ ਉੱਤੇ ਕੰਮ ਚੱਲ ਰਿਹਾ ਹੈ।
ਨਵੀਂ ਦਿੱਲੀ, 22 ਜੂਨ (Talking Punjab): ਅਮਰੀਕਾ ਵੱਲੋਂ ਇਰਾਨ ਦੇ ਨਿਊਕਲਿਅਰ ਠਿਕਾਣਿਆਂ ‘ਤੇ ਹਮਲੇ ਦੇ ਬਾਅਦ ਮਿਡਲ ਈਸਟ ਵਿਚ ਜੰਗ ਦੀ ਸਥਿਤੀ ਬਣ ਰਹੀ ਹੈ। ਇਸ ਦੇ ਬਾਵਜੂਦ ਭਾਰਤ ਨੇ ਕਿਹਾ ਹੈ ਕਿ ਦੇਸ਼ ਵਿਚ ਇੰਧਨ ਦੀ ਸਪਲਾਈ ਕਦੇ ਨਾ ਰੁਕੇ, ਇਹ ਯਕੀਨੀ ਬਣਾਇਆ ਜਾਵੇਗਾ।
ਭਾਰਤ ਦੇ ਪੈਟਰੋਲਿਅਮ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਐਤਵਾਰ ਨੂੰ ਕਿਹਾ ਕਿ ਭਾਰਤ ਇੰਧਨ ਦੀ ਘਰੇਲੂ ਸਪਲਾਈ ਨੂੰ ਬਚਾਉਣ ਲਈ ਹਰ ਲੋੜੀਂਦਾ ਕਦਮ ਚੁੱਕੇਗਾ। ਉਨ੍ਹਾਂ ਕਿਹਾ ਕਿ ਭਾਰਤ ਨੇ ਪਿਛਲੇ ਕੁਝ ਸਾਲਾਂ ਵਿਚ ਆਪਣੀਆਂ ਸਪਲਾਈਆਂ ਵਿੱਚ ਵੱਖ-ਵੱਖ ਰੂਟ ਜੋੜ ਕੇ ਵਿਵਿਧਤਾ ਲਿਆਂਦੀ ਹੈ।
ਉਨ੍ਹਾਂ ਨੇ ਸੋਸ਼ਲ ਮੀਡੀਆ ‘X’ ਉੱਤੇ ਲਿਖਿਆ,
“ਅਸੀਂ ਪਿਛਲੇ ਦੋ ਹਫ਼ਤਿਆਂ ਤੋਂ ਮਿਡਲ ਈਸਟ ਵਿੱਚ ਬਣੀ ਤਣਾਅ ਦੀ ਸਥਿਤੀ ਨੂੰ ਨਜ਼ਦੀਕੀ ਨਾਲ ਦੇਖ ਰਹੇ ਹਾਂ… ਸਾਡੀਆਂ ਤੇਲ ਮਾਰਕੀਟਿੰਗ ਕੰਪਨੀਆਂ ਕੋਲ ਕਈ ਹਫ਼ਤਿਆਂ ਲਈ ਸਪਲਾਈ ਉਪਲਬਧ ਹੈ ਅਤੇ ਸਪਲਾਈ ਕਈ ਰੂਟਾਂ ਰਾਹੀਂ ਜਾਰੀ ਹੈ।”
ਪੁਰੀ ਨੇ ਅੱਗੇ ਕਿਹਾ ਕਿ ਭਾਰਤ ਨੂੰ ਲੋੜ ਹੋਣ ‘ਤੇ ਹੋਰ ਦੇਸ਼ਾਂ ਤੋਂ ਕੱਚਾ ਤੇਲ ਲੈਣ ਦੀ ਵੀ ਯੋਜਨਾ ਹੈ। ਉਨ੍ਹਾਂ ANI ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ:
“ਅਸੀਂ ਸਾਰੇ ਸੰਭਾਵਤ ਸਾਥੀਆਂ ਨਾਲ ਸੰਪਰਕ ‘ਚ ਹਾਂ… ਅਸੀਂ ਉਮੀਦ ਕਰਦੇ ਹਾਂ ਕਿ ਇਹ ਸਥਿਤੀ ਵਧਣ ਦੀ ਬਜਾਏ ਠੰਢੀ ਹੋਵੇਗੀ।”
ਭਾਰਤ, ਜੋ ਕਿ ਦੁਨੀਆ ਦਾ ਤੀਜਾ ਸਭ ਤੋਂ ਵੱਡਾ ਤੇਲ ਆਯਾਤਕਾਰੀ ਦੇਸ਼ ਹੈ, ਆਪਣੀ 4.8 ਮਿਲੀਅਨ ਬੈਰਲ ਪ੍ਰਤੀ ਦਿਨ ਦੀ ਤੇਲ ਲੋੜ ‘ਚੋਂ ਅੱਧ ਤੱਕ ਮਿਡਲ ਈਸਟ ਤੋਂ ਆਯਾਤ ਕਰਦਾ ਹੈ।
ਇਸ ਤੋਂ ਇਲਾਵਾ, ਭਾਰਤੀ ਵਿਦੇਸ਼ ਮੰਤਰਾਲੇ ਨੇ ਦੱਸਿਆ ਕਿ ਇਰਾਨ ਦੇ ਰਾਸ਼ਟਰਪਤੀ ਮਸਉਦ ਪੇਜੇਸ਼ਕੀਆਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਫੋਨ ਕਰਕੇ ਇਰਾਨ ਅਤੇ ਇਜ਼ਰਾਈਲ ਵਿਚ ਚੱਲ ਰਹੀ ਤਣਾਅ ਬਾਰੇ ਜਾਣਕਾਰੀ ਦਿੱਤੀ।
