ਦੱਖਣੀ ਅਫਰੀਕਾ ਦੇ ਪੂਰਵ ਕਪਤਾਨ ਏਬੀ ਡਿਵਿਲੀਅਰਸ ਨੇ ਖੁਲਾਸਾ ਕੀਤਾ ਹੈ ਕਿ ਵਿਰਾਟ ਕੋਹਲੀ ਨੇ ਕਈ ਮਹੀਨੇ ਤੱਕ ਉਹਨਾਂ ਨਾਲ ਕੋਈ ਸੰਪਰਕ ਨਹੀਂ ਕੀਤਾ ਸੀ। ਡਿਵਿਲੀਅਰਸ ਨੇ ਦੱਸਿਆ ਕਿ ਇਹ ਤਣਾਅ ਉਸ ਸਮੇਂ ਸ਼ੁਰੂ ਹੋਇਆ ਜਦੋਂ ਉਨ੍ਹਾਂ ਨੇ ਇਕ ਲਾਈਵ ਸਟ੍ਰੀਮ ਦੌਰਾਨ ਅਨੁਸ਼ਕਾ ਸ਼ਰਮਾ ਦੀ ਗਰਭਵਤੀ ਹੋਣ ਬਾਰੇ ਗਲਤੀ ਨਾਲ ਖੁਲਾਸਾ ਕਰ ਦਿੱਤਾ ਸੀ।
ਪਿਛਲੇ ਸਾਲ ਡਿਵਿਲੀਅਰਸ ਨੇ ਇਸ਼ਾਰਾ ਦਿੱਤਾ ਸੀ ਕਿ ਵਿਰਾਟ ਤੇ ਅਨੁਸ਼ਕਾ ਆਪਣੇ ਦੂਜੇ ਬੱਚੇ ਦੀ ਯੋਜਨਾ ਬਣਾ ਰਹੇ ਹਨ, ਜਿਸ ਤੋਂ ਬਾਅਦ ਕੋਹਲੀ ਨੇ ਇੰਗਲੈਂਡ ਵਿਰੁੱਧ ਘਰੇਲੂ ਟੈਸਟ ਸੀਰੀਜ਼ ਤੋਂ ਵੀ ਹਟਣ ਦਾ ਫੈਸਲਾ ਕੀਤਾ ਸੀ। ਕੁਝ ਦਿਨ ਬਾਅਦ ਡਿਵਿਲੀਅਰਸ ਨੇ ਦੂਜੀ ਵੀਡੀਓ ਵਿੱਚ ਮੰਨਿਆ ਕਿ ਉਨ੍ਹਾਂ ਨਾਲ ਵੱਡੀ ਗਲਤੀ ਹੋ ਗਈ ਸੀ ਅਤੇ ਜੋ ਗੱਲਾਂ ਉਨ੍ਹਾਂ ਸਾਂਝੀਆਂ ਕੀਤੀਆਂ, ਉਹ ਸੱਚ ਨਹੀਂ ਸਨ।
ਹਾਲਾਂਕਿ, ਆਈਪੀਐਲ 2025 ਦੇ ਫਾਈਨਲ ਦੌਰਾਨ, ਜਿੱਥੇ ਰਾਇਲ ਚੈਲੇਂਜਰਸ ਬੰਗਲੌਰ ਨੇ ਪੰਜਾਬ ਕਿੰਗਜ਼ ਨੂੰ ਹਰਾਕੇ ਆਪਣਾ ਪਹਿਲਾ ਆਈਪੀਐਲ ਖਿਤਾਬ ਜਿੱਤਿਆ, ਕੋਹਲੀ ਅਤੇ ਡਿਵਿਲੀਅਰਸ ਇੱਕ ਵਾਰੀ ਫਿਰ ਮਿਲੇ ਅਤੇ ਗਲੇ ਮਿਲ ਕੇ ਜਸ਼ਨ ਮਨਾਇਆ। ਡਿਵਿਲੀਅਰਸ ਨੇ ਕਿਹਾ, “ਵਿਰਾਟ ਨੇ ਛੇ ਮਹੀਨੇ ਪਹਿਲਾਂ ਮੁੜ ਮੇਰੇ ਨਾਲ ਗੱਲ ਕਰਨੀ ਸ਼ੁਰੂ ਕੀਤੀ। ਰੱਬ ਦਾ ਸ਼ੁਕਰ ਹੈ! ਮੈਂ ਕੁਝ ਸਮਾਂ ਪਹਿਲਾਂ ਉਸਨੂੰ ਮਿਲਣ ਗਿਆ ਸੀ, ਜਦੋਂ ਉਹ ਆਪਣੇ ਦੂਜੇ ਬੱਚੇ ਦੀ ਉਮੀਦ ਕਰ ਰਿਹਾ ਸੀ। ਜਦੋਂ ਉਸਨੇ ਦੁਬਾਰਾ ਸੰਪਰਕ ਕੀਤਾ, ਤਾਂ ਮੈਨੂੰ ਬਹੁਤ ਰਾਹਤ ਮਹਿਸੂਸ ਹੋਈ।”
